سەرەتای ھێز بۆ میدیا؛ خڕکردنەوەیەتی 

 ئەوەی ببیتەوە ژمارەی یەكەم دەبێت جەمع ‌و تەرحی ژمارەی خۆت بكەیتەوە. دەبێ ببیتەوە هێزی كەمەندكێش. هێزی سازدانەوە لە هەموو ئاستەكاندا. ئەمە دانایی ‌و عەبقەریەتێكی گەورەی ناوێت، بەڵكو لێكدانەوە ‌و هەڵسەنگاندنێكی ئاسایی دەوێت.

- بۆ پایەداری لە پەرلەمان، ژمارەی كورسییەكانت قسە دەكات تا زۆرینە بیت لە پەرلەمان.
- بۆ بردنەوەی نەبەردیی دیموكراتی هەڵبژاردن ژمارەی كورسی دەتوانێ هێزی بڕیار بێت.
- بەڵام هێزی ژمارەی كورسیش بەس نییە، ئەگەر چەترێكی هێز نەبێت كە دڵنیایی بداتە كورسی ‌و دانیشتوانەكانی كە رۆماڵدەكرێت ‌و پشتیوانی دەبن لە لێقەوماندا.

چەتری هێزی سیاسی بەچی دەبێت ئەگەر هێزە سیاسییەكە كەمەندكێش نەبێت؟ 
فەزای سیاسی بەهێز بە چاككردنی ریزبەندیی زۆنی سیاسیی جێ نفوز دەبێت.
ریزبەندی لایەنەكان، هی ئەرك ‌و فەرمانەكان، هی بەش ‌و سەنگەكان ‌و رێوشوێنێكی كارای هەمەڕەنگی، بەڵام یەك دەست ‌و یەك تیم.

لێرەوە چەمكی بارستایی مێژوویی گرامشی مانا پەیدا دەكات. ئەگەر لەجێی بارستایی مێژوویی ناونیشانەكە تەنكتر بكەین دەكرێ بڵێین (فراكسیۆنی مێژوویی).

واتا رێگاکردنەوە بۆ کۆکردنەوەی هەر كەسێك دەنكە جۆیەكی ماڵی پاشای خواردبێ. ئەو کەسە دەشێ بەشێك بێ لەو فراكسیۆنە مێژووییە، بەڵام نابێ هێزی فراكسیۆنەكە گیان ‌و تەنی سەرشان وا قورس بكات كە لەجێی بارستایی ببێتە بارگاوی.

لێرەوە بایەخی چەمكی میكانیزم ‌و دینامیكییەت دەردەكەوێت. هێزی بارستایی تا نەبێتە بارگاوی بە لەشی قورس پێویستی بە میكانیزمی كارا ‌و كاریگەر هەیە. ئەمە پێی دەڵێن دینامیكییەت كە بزاوت ‌و دەستپێشخەری ‌و دەستوبردی دابین دەكات.

ئەم چەترەی هەڵقوڵاوی فراكسیۆنی مێژووییە فەزای ناوچەی نفوز رێكدەخاتەوە، ژینگەكەی پاكژ دەكاتەوە بۆ هەناسەدان ‌و بەرهەڵداكردنی ئەندێشە ‌و توانستە هەمەجۆرەكان.

بەو چەتر ‌و هێزەوە دەتوانیت ژمارەی كورسی لە ژمارەی بێدەنگەوە بكەیتە ژمارەی رۆح لەبەر. بۆ بردنەوەی نەبەردیی دیموكراتی، بۆ راستكردنەوەی رێرەوی سیاسی ‌و بەهێزكردنی دینگەی سیاسی بۆ هەر رێبازێكی سیاسی.

میدیاش دەتوانێ هێزێكی كاریگەر بێ لەم رێرەوەدا، لە سەرەتاوە، لە ناوەڕاست ‌و لە دەستپێداهێنانەوەی كۆتاییشدا.
بەڵام میدیا لە بۆشاییدا هیچی پێ ناكرێ، میدیا لە پڕی ‌و پۆشتە ‌و پەرداخی هێزە سیاسییەكەدا دەتوانێ: كارا بكرێت، چاودێر بكرێت ‌و لێپرسینەوەشی لەگەڵدا بكرێت تا بە سیخورمە ‌و كوتانەوە ‌و ئەدگار نواندنەوە ببێتە كارەكتەری جێی دڵخواز لە جێبەجێكردنی ئەركەكاندا.

میدیا دەتوانێ لە خراپی ‌و لاوازی خۆیدا دەستكەوت ‌و سەنگی هێزی سیاسی باشیش بە فەوتان بدات، بەڵام بێ هێزی سیاسیی دڵخوازیش ناتوانێ ھیچ بکات 

سەرەتای هێز بۆ میدیا خڕكردنەوەیەتی.