مەودا میدیا-

 

خۆپیشاندانی هاوڵاتییانی پێنجوێن بۆ رۆژی سێهەم بەردەوامە و لەئێستا خەڵکی پێنجوێن و دەورووبەری داوای کارەبای 24 کاتژمێری دەکەن. قایمقامی شارەکەش دەڵێت، تا ئێستا کەس نەهاتووە بەدەم داوای خۆپیشاندەرانەوە.

بەو سەرمایە ماوەی سێ رۆژە هاوڵاتییانی بە رۆژ و شەو هاتوونەتە سەر شەقام و داوای دابینکردنی کارەبا و دابەشکردنی بەشی دووهەمی نەوتی سپی ماڵان و تەواوکردنی خزمەتگوزارییەکان لە حکومەتی هەرێمی کوردستان دەکەن، بەڵام تاوەکو ئێستا هیچ کەسێک نەهاتووە بەدەم داواکارییەکانیانەوە هەر بۆیە ئەوانیشی بەردەوام لە دەربڕینی ناڕەزایەتی و خۆپیشاندا و بەستنی رێگا سەرەکییەکانی پێنجوێن.

هاوڵاتییانی پێنجوێن باسلەوە دەکەن کە بەهۆی کەمکردنەوەی کارەبا و نەبوونی سوتەمەنی پێویست کێشەیان بۆ دروستبووە و پێویستە حکومەت بێت بەدەم داواکارییەکانیانەوە.

لای خۆشییەوە زانا رەحمان قایمقامی پێنجوێن پشتگیری خۆی بۆ خۆپیشاندەران دەربڕی و دەڵێت، داواکاری خۆپیشاندەران رەوایە و ئێمە کاری لەسەر دەکەین. داواشی لە لایەنە پەیوەندیدارەکان کرد کە بێن بەدەم داواکاریی خەڵکەوە.

پێنجوێن لە ئێستادا 23 کاتژمێر کارەبایان هەیە بە کارەبای نیشتمانی و موەلیدەوە و لەماوەی رابردوودا کارەبایان لە ئێرانەوە بۆ هاتبووە، بەڵام ئێستا حکومەتی هەرێم کارەبای پێنجوێن دابیندەکات.

دەرباەری سووتەمەنی، تا ئێستا خەڵکی پێنجوێن 200 لیتر نەوتییان وەرگرتووە و وەک خۆیان دەڵێن، بە پێیەی پێنجوێن ساردە ئەو بڕە بۆ ئەوان کەمە.

 

 ژ.م