مەودا میدیا-

 

ماوەی 3 رۆژە هاوڵاتییانی پێنجوێن بەهۆی نەبوونی خزمەتگوزاری و کەمکردنەوەی کارەبای ناوچەکەیان و دابەشنەکردنی سوتەمەنی بەردەوام لە دەربڕینی ناڕەزایەتی، تا ئێستاش کەس بەدەم داواکارییەکانیانەوە نەرۆشتووە، بەھۆی فشار و ناڕەزایەتی ھاوڵاتییان دژی نەبونی خزمەتگوزاریی و بەدەمەوە نەهاتنیان زانا ڕەحمان قایمقامی پێنجوێن دەستی لەکارکێشایەوە.

دەقی دەستلەکارکێشانەوەکەی:

بسم الله الرحمن الرحيم

لَا يُكَلِّفُ اللَّهُ نَفْسًا إِلَّا وُسْعَهَا

 

      ‌                 دەست بەرداربوون

ماوەی زیاتر لە 8 هەشت ساڵە ئەمانەتی بەرپرسیارێتی پۆستی قایمقامییەتی قەزای پێنجوێن لەسەر شانمە و نێوانی خۆم و خودای گەورە بۆ یەک ساتیش خیانەت و کەمتەرخەمیم لە کارەکەمدا نەکردووە و پۆستی قایمقامییەتیم بۆ بەرژەوەندی تایبەتیم بەکارنەهێناوە و هەمیشە پاڵپشت و داکۆکیکاری مافەکانی هاوڵاتییانی خۆشەویستی قەزاکەم بووم و لەخۆشی و ناخۆشییاندا بەشدار بووم.

بەداخەوە چەندین ساڵە لێپرسراوانی سەرووی خۆمان دەستەوسان بوون و نەیانتوانیوە ئاوڕێکی جدی لە سنوری قەزای پێنجوێن بدەنەوە و بودجە و خزمەتگوزاری پێویستی بۆ دابین بکەن ئەمە سەرەڕای ئەوەی چەندین جار داواکاری پێنجوێنمان گەیاندووە پێیان و زیاتر لە ماوەی سێ ڕۆژە بەشێکی زۆری هاوڵاتییانی خۆشەویستی قەزاکەم لەسەر جادەن و داوای چاککردنی بارودۆخی کارەبا دەکەن، بەڵام تا ئێستا بێ وەڵام ماوینەتەوە و کێشەکەمان بۆ چارەسەر نەکراوە سەرەڕای ئەوەی دەیان جار لە دەرگای لایەنە پەیوەندیدارەکانمان داوە.

بۆیە وەک بەرپرسێک کە هەستی بەرپرسیارێتیم هەیە لەبەردەم خودای گەورە و ئەمانەتی بەرپرسیارێتیم لەسەر شانە بەرامبەر بە خەڵکی سنووری قەزای پێنجوێن دەست بەرداری پۆستی قایمقامییەتی قەزای پێنجوێن دەبم وەک دەربڕینی ناڕەزایەتی و بەدەمەوە نەهاتن بۆ چارەسەرکردنی کێشەکان و دابین نەکردنی خزمەتگوزارییەکانی سنووری قەزای پێنجوێن.

داوای لێبوردن لەخودای لێبووردە و میهرەبان و پاشان خەڵکی خۆشەویستی سنووری قەزای پێنجوێن دەکەم لە هەر کەموکورتییەک لە کاروبارمدا هەبووبێت.

لە کۆتاییدا زۆر سوپاسی هەموو ئەو بەڕێزانە دەکەم کە هاوکار و پاڵپشتم بوون بۆ باشتر ڕاپەڕاندنی کارەکانی قایمقامییەتیم لە دام و دەزگاکانی حکومی و مامۆستایانی ئایینی و لایەنی ئەمنی و لایەنە سیاسییەکان و کەسایەتییە خێرخوازەکان و فەرمانبەرانی قائیمقامییەت و ئەوەی ڕۆژێک لە ڕۆژان بەتەنها وشەیەکیش یارمەتیدەرم بووبێ بۆ باش بەرەوپێش چوون و سەرکەوتنم و زۆر سوپاسی بزووتنەوەی گۆڕان و مەکۆی پێنجوێن دەکەم کە متمانەیان پێکردم و بەرپرسیارێتی پۆستی قایمقامییەتی قەزای پێنجوێنیان بەمن سپارد.

جێی شانازی بوو بۆ من کە وەک پێنجوێنییەک ماوەی 8 هەشت ساڵ لەخزمەتی هاوڵاتییانی سنووری قەزاکەمدا بووم.

کەپێنجوێنی بوونم شانازییە بۆم و شانازی بە گەورە و بچووکی پێنجوێنییەکانەوە دەکەم.

 

رَبَّنا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ...

وَتُبْ عَلَيْنا إِنَّكَ أَنْتَ التَّوَّابُ الرَّحِيمُ...

 

                                            زانا ڕەحمان ڕەحیم

    ‌                                 قائیمقامی قەزای پێنجوێن

 

ژ.م