لە جیهانی ئەمڕۆدا دیاردەی کەسایەتی نەرێنی بووەتە یەکێک لە گەورەترین ئاستەنگەکانی بەردەم پێشکەوتنی تاک و کۆمەڵگە. ئەم دیاردەیە، کە بەشێوەیەکی بەرچاو لە کۆمەڵگەی هاوچەرخدا بڵاو بووەتەوە، کاریگەریی قووڵی لەسەر ژیانی کەسی و پەیوەندییە کۆمەڵایەتییەکان داناوە. کەسایەتی نەرێنی تەنیا رەوشێکی کاتیی نییە، بەڵکوو دۆخێکی ئاڵۆزە، کە ریشەی قووڵی لە ژیانی تاکدا هەیە.

کەسایەتی نەرێنی، لە بنەڕەتدا شێوازێکی تایبەتە لە بیرکردنەوە و هەڵسوکەوت کە کەسەکە بەردەوام لایەنە تاریک و نەرێنییەکانی ژیان دەبینێت. ئەو کەسانە زۆربەی کات بە چاوێکی گومان و رەشبینانە سەیری دەوروبەر و داهاتوو دەکەن و متمانەیان بە خۆیان و کەسانی دیکە زۆر کەمە، ئەمەش وا دەکات بەردەوام لە دۆخی گلەیی و سکاڵادا بژین و هەمیشە رەخنە لە کەسانی دەوروبەریان بگرن.

هۆکارەکانی دروستبوونی کەسایەتی نەرێنی، فرەڕەهەندن، لە لایەکەوە ئەزموونە تاڵەکانی منداڵی و کەمیی خۆشەویستی و سۆز لە سەرەتای ژیاندا، دەتوانن ببنە هۆی دروستبوونی ئەو جۆرە لە کەسایەتی، لە لایەکی دیکەوە ژینگەی نەگونجاو و فشارە کۆمەڵایەتییەکان، رۆڵێکی گرنگ دەگێڕن لە پێکهێنانی ئەو جۆرە لە کەسایەتی. هەروەها کێشە دەروونییەکانی وەک خەمۆکی و دڵەڕاوکێ، دەتوانن کەسەکە بەرەو کەسایەتییەکی نەرێنی ببەن.

کاریگەرییەکانی کەسایەتی نەرێنی، لەسەر ژیانی تاک زۆر قورسن. ئەو کەسانە بەردەوام لە دۆخێکی دەروونیی ناجێگیردا دەژین و توانای چێژوەرگرتنیان لە ژیان کەمە. لە رووی جەستەییەوە زۆر جار تووشی ماندوبوونی بەردەوام و کێشەی خەوتن دەبن. سەرئێشە و ئازارە جەستەییەکان، دیاردەیەکی باون لەو کەسانەدا. هەروەها سیستمی بەرگری لەشیان لاواز دەبێت و زیاتر تووشی پەتا و نەخۆشی دەبن.

لە رووی کۆمەڵایەتییەوە؛ کەسایەتی نەرێنی دەبێتە هۆی دابڕان لە کۆمەڵگە و لاوازبوونی پەیوەندییەکان، ئەو کەسانە زۆر جار هاوڕێکانیان لەدەست دەدەن و لە دۆزینەوەی هاوبەشی ژیاندا سەرکەوتوو نابن. لە ژینگەی کاردا بەرهەمدارییان کەم دەبێتەوە و لە پێشکەوتنی پیشەیی بێبەش دەبن. هەموو ئەمانە دەبنە هۆی دروستبوونی بازنەیەکی بەردەوام لە نەرێنی و ناخۆشی.

کەسانی نەرێنی، هەوڵ دەدەن هەرچی بیانەوێت دەستیان بکەوێت بێ ئەوەی هیچ بایەخێک بۆ کێبڕکێی ئەقڵانی دابنێن، بەهای هاوڕێیەتییان بە رادەی سوودوەرگرتن و دەستکەوتەکانیان دەپێون، بەردەوام رەخنەگرن و ئەوەی بایەخی پێ دەدەن لایەنە نەرێنییەکانی خەڵکە و جەخت لەسەر هەڵەکانیان دەکەنەوە نەک دەستکەوتەکانیان. رای خۆیان پێ راستە، بەڵام ناتوانن دەریببڕن و باسی بکەن. ترسیان لە دواڕۆژ زۆرە، بۆیە خاوەنی بڕیار نین. هەوڵ دەدەن لە توانای خەڵک کەم بکەنەوە، خۆیان وا نیشان دەدەن کەسێکی گرنگ و سەرقاڵن، لێکدانەوەی نەرێنیی خۆیان بۆ قسە و هەڵسوکەوتی کەسانی تر هەیە بێ ئەوەی مەرامی بەرانبەر بزانن... ئێستا لە تۆڕە کۆمەڵایەتییەکاندا ئەو جۆرە کەسانە بەئاسانی دەناسرێنەوە، بە مەبەست بێت یان بێ مەبەست، لە کۆمێنت و رادەربڕیندا، دوور لە هەموو بەها و نەریت و تێگەیشتن و هەڵسەنگاندنێک، رایەکی نەرێنی بە جنێو یاخود بە شکاندنەوە دەردەبڕن و وەک دوژمن سەیری زۆربەی خەڵک دەکەن.

کەسانی نەرێنی بازنەیەک دروست دەکەن و هەوڵ دەدەن خەڵک رابکێشنە ناو ئەو بازنەیە، بۆیە باشتر وایە گوێ بە چیرۆکە وەهمییەکانیان نەدەیت و بەهەند وەرینەگریت. 

لەگەڵ ئەوەش، هەمیشە هیوا هەیە بۆ گۆڕینی ئەو دۆخە. چارەسەری کەسایەتی نەرێنی پێویستی بە هەوڵی بەردەوام و پلانێکی درێژخایەن هەیە. یەکەم هەنگاویش دانپێدانانە بە بوونی کێشەکەدا و قبووڵکردنی پێویستیی گۆڕان، پاشان وەرگرتنی یارمەتی پسپۆڕان، بۆ نموونە؛ راوێژکاری دەروونی دەتوانێت یارمەتیدەر بێت. فێربوونی تەکنیکەکانی بیرکردنەوەی ئەرێنی و خۆڕێکخستن گرنگن بۆ گۆڕینی ئەو دۆخە، هەروەها پشتیوانیی خێزان و کەسانی نزیک، رۆڵێکی گرنگ دەگێڕن لە چارەسەری کەسایەتی نەرێنی، ئەمە جگە لەوەی بەشداریکردن لە چالاکییە کۆمەڵایەتییە ئەرێنییەکان و دروستکردنی ژینگەیەکی تەندروست دەتوانن یارمەتیدەر بن. هەروەها پەیڕەوکردنی ژیانێکی تەندروست، وەک: وەرزشکردن و خواردنی باش، کاریگەریی ئەرێنی دەبێت لەسەر بارودۆخی دەروونی.

لە کۆتاییدا دەبێت بزانین کە گۆڕینی کەسایەتی نەرێنی، پرۆسەیەکی خێرا نییە، بەڵکوو گەشتێکی درێژە و پێویستی بە ئارامی و خۆڕاگری هەیە. هەر هەنگاوێکی بچووک بەرەو گۆڕانکاری، سەرکەوتنێکە کە شایەنی دەستخۆشییە، بە یارمەتی و پشتیوانیی گونجاو، دەکرێت کەسایەتی نەرێنی بگۆڕدرێت بۆ کەسایەتییەکی ئەرێنی و بەرهەمدار، کە توانای چێژوەرگرتنی لە ژیان هەبێت و رۆڵێکی ئەرێنی لە کۆمەڵگەدا بگێڕێت. 

ر.س