بەگوێرەی زانیارییە بڵاوکراوەکان، هێزە عەرەبییەکانی کەرکوک، گەیشتوونەتە رێککەوتن لەسەر پێکهێنانی لیستێکی عەرەبیی هاوبەش، هۆکارەکەیشی بۆ ئەوە دەگەڕێننەوە کەوا مەترسیی لەسەر پێکهاتەی عەرەبی شارەکە هەیە.

عەزام حەمدانی، کەوا وتەبێژی ئەنجومەنی عەرەبیی یەکگرتووە لە شاری کەرکوک دەڵێت "پرۆسەی سیاسی لە کەرکوک ئاڵۆزە بووە، بۆیە لایەنە عەرەبییەکان یەکدەگرن و لە هەڵبژاردنی پارێزگاکەدا رکابەریی کورد و تورکمان دەکەن و دەیانەوێت بە لیستێکی هاوبەش، زۆرینەی دەنگی پارێزگاکە بەدەستبهێنن و رێگری بکەن لە پەرتەوازەبوونی دەنگی عەرەب".

ئەمە هاوکاتە لەگەڵ بەڕێوەچوونی پرۆسەی تەعریبی نوێ کە سوننە و شیعە تیایدا هاوبەشن و سوورن لەسەر کاڵکردنەوەی ناسنامەی کوردستانیی کەرکوک، بۆ ئەوەش دەرفەتی زۆر لەبەردەمیاندا هەیە، بەتایبەت کەوا لایەنەکانی کورد زۆر دوورن لەیەکەوە و تائێستا پرۆژەیەکی کوردیی هاوبەش نییە بۆ پاراستنی کەرکوک و ناسنامەکەی.

کەرکوک، یان هەر بستە خاکێکی کوردستانی بەلای بیری راستەقینەی نەتەوەیی و جوگرافیای سیاسییەوە، پیرۆزە و هێڵی سوورە، داگیردەکرێ، بەڵای دەستی لێ هەڵناگیرێ، خەبات بۆ وەرگرتنەوەی بەردەوام دەبێ و مادام کۆڵنەدان هەبێ، وەرگرتنەوەی خاک و ماف، مسۆگەر دەبێ، درەنگ یان زوو، ئەوە پەیوەندیی بە زۆر هۆکارەوە هەیە، نایەکگرتوویی هێزە کوردییەکان یەکێکیانە.

بڕیارە رۆژی ٦ی تشرینی دووەمی ٢٠٢٣، هەڵبژاردنی ئەنجومەنی پارێزگای کەرکوک ئەنجامبدرێت، بەڵام تائێستا هەوڵی سەرەتایی یان جدی بۆ پێکهێنانی لیستێکی کوردستانی نابینرێت، راستییەکەی ئەوە خەمساردییەکی سیاسیی مەترسیدارە، لەکاتێکدا عەرەب بە سوننە و شیعەوە کەوتوونەتە خۆ بۆ بردنەوە لە کورد، روونە ئەگەر براوەبن، ئەوا دەیکەنە بنەما بۆ رێککەوتنە سیاسییەکانی داهاتوو، لە سیاسەتیشدا ژمارە و دەنگ دەبنە بنەمای هاوبەشێتی نەک سۆز و برایەتی و بانگەشەی پێکەوەژیان.

کەرکوک، کەوا بەدرێژایی مێژوو خاڵی هاوبەشی خەباتی سیاسی و شۆڕشگێڕیی کورد بووە، رەنگە لە هەڵبژاردنی تشرینی دووەمدا ببێتە خاڵی مەترسیی بۆ سەر شوناسە نەتەوەییەکەی، بۆ ئەوەش پێویستیی بە هەوڵی نیشتیمانیی هەیە کە بەسەر هەوڵی عەرەبی و مەترسیی هەرێمایەتی و نێودەوڵەتیدا سەربکەوێ، جگە لە یەکگرتوویی و بە بنەما وەرگرتنی کوردستانیەتی کەرکوک و وەلانانی بەرژەوەندیی تەسکی حزبایەتی، هیچی دیکە دەستەبەری پاراستنی خەڵک و خاکی کەرکوک ناکات، قەرەبووکردنەوەی لەدەستچوونیشی، خەبات و خوێن و دەرفەتی زێڕینی دەوێ، کە رەنگە ئاسان و زوو نەیەنە پێش.

سیاسەتی ژیرانە و سیاسەتمەداری پراگماتیک، لەکاتی وادا دەردەکەون، هەروەک پێموایە فشاری خەڵک و شەقام گرنگن بۆ ناچارکردنی سەرکردایەتیی هێزەکانی کوردی و کوردستانی بە رێککەوتن لەسەر پرۆژەیەکی هاوبەش و نیشتیمانی بۆ دەربازکردنی کەرکوم لە مەترسییەکانی سەری.